Korali Isezerano y’i Nyamagabe yakoreye umuganda aho yaje mu ivugabutumwa

Yanditswe na RUKUNDO Emmanuel Kuwa 30/11/2019, Saa 10:48:48 Yasuwe inshuro 481

Korali Isezerano yo mu itorero rya Pantekote mu Rwanda ADEPR mu itorero ry’Akarere rya Nyamagabe muri Paruwasi ya Sumba, ku Mudugudu wa Sumba, mu karere Nyamagabe, iri mu rugendo rw’ivugabutumwa kuva kuri uyu wa 30/11/2019 kugera kuri uyu wa 01/12/2019 mu Mujyi wa Kigali, muri Paruwasi ya Nyarugunga, ku Mudugudu wa Nyarugunga.

Iyi korali ikigera mu Mujyi wa Kigali yatunguye abantu, kuko yakoze urugendo rw’amasaha asaga 4, ikagera mu Mujyi wa Kigali abantu batarabyuka bamwe mu bakristu baganiriye n’itangazamakuru bahita bemeza ko bigaragaza korali izi icyo yahamagariwe.

Umwe yagize ati:” Mu by’ukuri niba Korali ikora urugendo rungana rutya igasanga twe twabatumiye tutaranabyuka, biradutangaje ariko binatweretse ko hari abazi icyo bahamagariwe.”

Iyi korali mbere y’uko itangira ivugabutumwa, yakoranye umuganda n’abaturage b’i Nyarugunga, Perezida wayo Rusingizandekwe Paul abwira abanyamakuru ko kwamamaza ubutumwa bwiza bwa Yezu Kristu ukanubahiriza gahunda za Leta nta cyaha kibirimo.

Ati:”Tugomba kubahiriza gahunda za Leta, tukanaba ikitegererezo kiza ku bandi baturage nk’abantu bamenye Kristo.”

Bamwe mu batuye mu Murenge wa Nyarugunga bashimye iyi korali Isezerano yakoranye nabo umuganda, bavuga ko bitanze kuko bagakwiye kuba baryama bagasinzira kuko baraye ijoro bagenda.

Korali Isezerano, iheruka gukora urugendo rw’ivugabutumwa mu karere ka Huye, tariki ya 15 Nzeri 2019 muri Paruwasi ya Cyarwa inahamurikira indirimbo yabo nshyashya yitwa “Iyavuze.”

Nyuma y’uru rugendo rw’ivugabutumwa, iyi korali Isezerano ku itariki 13/10/2019 yakoreye urundi muri Paruwasi ya Murambi mu karere ka Nyamagabe, kuri ubu ikaba iri mu rugendo rw’ivugabutumwa mu Mujyi wa Kigali i muri Paruwasi ya Nyarugunga.

Korali Isezerano yatangiye kumenyekana cyane mu mwaka wa 2009, ubwo yashyiraga hanze umuzingo wayo wa mbere yise ‘Ineza’.

Korali Isezerano yatangiye umurimo w’uburirimbyi mu mwaka w’1999 itangiriye mu cyumba cya Kabacuzi mu cyahoze ari umudugudu wa Gikongoro Paruwasi ya Gikongoro, ubu ni Paruwasi ya Sumba.

Yatangiye igizwe n’abaririmbyi 5 muri bo 3 baracyakora umurimo w’Imana wo kuyiririmbira muri iyi korali, kandi kuri ubu abaririmbyi bose barasaga 115.

Mu rwego rwo kumenyekana no gukomeza kogeza ijambo ry’Imana hirya no hino binyuze mu ndirimbo, mu mwaka wa 2009 korali Isezerano yasohoye umuzingo w’ indirimbo z’amajwi n’amashusho. Ndetse mu mwaka wa 2017 bashoboye gushyira hanze undi muzingo w’indirimbo z’amajwi n’amashusho wiswe “Ibyo wankoreye Mana”

Dorere bamwe mu bagiye bayobora korali Isezerano

• Nzabihimana J. Marie Vianney yayiyoboye kuva 1999 kugeza 2000
• Bizumuremyi John 2000 yayiyoboye kugeza 2014
• Rusingizandekwe Paul yayiyoboye kuva 2014 kugeza ubu.

Reba hano uburyo Chorale Isezeranyo/ADEPR Nyamagabe yabanje gukora umuganda mu Mujyi wa Kigali aho yagiye mu ivugabutumwa