Gatsibo/Muhura: Hateguwe igitaramo cyo kwibukiranya uko Yesu yacunguye isi

Yanditswe na Ubwanditsi Kuwa 23/12/2017, Saa 15:12:55 Yasuwe inshuro 202

Mu gihe habura iminsi ibarirwa ku ntoki ngo umunsi mukuru wizihiwa n’abakristu bose ku isi ugere ariwo Noheri,itorero Angilikani mu karere ka Gatsibo mu murenge wa Muhura ,riri gutegura igitaramo cyo kwibukiranya uko Yesu yacunguye isi.

Mu gusoza umwaka no gutangira umushya, ari byo bihe bita ibya Noheri n’ubunani, usanga hirya no hino abantu bafata ibi bihe nk’ibidasanzwe, aho bategura uburyo bwo kwishima bishimana n’inshuti n’abavandimwe, basubiza amaso inyuma bashima Imana mu bitaramo bitandukanye.

Nk’uko Ndayisaba Richard, umwe mu bategura iki gitaramo yabitubwiye, yavuze ko iki giterane bagiteguye mu rwego rwo kwibukiranya icyazanye Yesu mu isi.

Yagize ati’’Iki giterane gifite intego dusanga muri Yohana 8:36, handitse ngo’’Ni uko umwana niyababatura muzaba mubatuwe by’ukuri’’. Twahisemo kugitegura mu bihe bya Noheli, kugirango twibukiranye, Yesu uwo ari we ndetse n’icyamuzanye mu isi, ko ari igitambo cyacungura ibyaha bya muntu kandi ko iyo ataza nta gitambo cy’ibyaha byacu cyari kuboneka bityo dufite ubutsinzi bw’icyaha binyuze muri Kristo Yesu’’.

’’Indi ntego tuzagenderaho ni iri muri Tito 2:11-14, hagira hati’’Kuko Ubuntu bw’Imana buzanira abantu bose agakiza bwabonetse, butwigisha kureka kutubaha Imana n’irari ry’ibyisi.’’

Ngo mu kuza kwa Kristo kwazaniye abamwemera bose gukira urubanza rw’iteka.

Mu gushaka kumenya icyo abantu bazaba biteze kuri uyu munsi, Richard yatubwiye ko hari abayobozi b’itorero, abavugabutumwa batandukanye n’abahanzi.

Yagize ati’’ Iki giterane kugirango kibashe kuba, byagizwemo uruhare n’itorero Angilikani Dioseze ya Byumba, paruwasi ya Muhura, rero abayobozi bacu bazaba bahari, nka Venerable Archdeacon Canon Ndayisaba Cesar, wa Paruwasi ya Muhura, Rev. Pastor Balaka Mutesa Theogene uzaturuka muri Restoration Gicumbi-Byumba, abavuga butumwa nka Honore, Serge, Gisabo Eric n’abandi.’’

Yakomeje agira ati’’ Hazaba hari abahanzi ku giti cyabo nka Job Batatu, Igorora I. Dieudonne, Ndayisaba, Kwizera Jephthah n’abandi.’’

Uretse indirimbo z’abahanzi ku giti cyabo, ngo muri iki giterane hazaba harimo indirimbo z’amakorari atandukanye n’amatsinda aramya nka Chorale Ijwi ry’Ibyiringiro, Salem, Mass choir y’abanyeshuri, n’abandi.

Muri iki gitaramo kizabera I Muhura, taliki 24 Ukuboza 2017, hazaba ho ivugabutumwa mu ndirimbo, ku bwiriza, gusengera abarwayi ndetse no kwerekana filime y’ivuka rya Yesu kizaba guhera saa munani z’umugoroba kugeza saa kumi n’ebyiri.


      

Tanga igitekerezo

-->