Ibigwi n’amateka bya Urban Boys bamaze kuba ubukombe mu muziki ugezweho

Yanditswe na TWAHIRWA Emmy Kuwa 19/09/2017, Saa 14:09:28 Yasuwe inshuro 1145

Niyibikora safi uzwi nka Madiba, Nshimiyimana Mohamed uzwi nka Nizzo ndetse na Manzi James uzwi ku izina rya Humble Jizzo ni bamwe mu batangije itsinda rya Urban Boys, hari mu mwaka wa 2007.

Itsinda rya Urban Boyz ryatangiye umuziki muri 2007, ritangirizwa mu karere ka Huye aho bamwe mu baritangije bigaga, cyane ko Nizzo yigaga muri SEFOTEK,Humble G yiga muri Kaminuza Nkuru y’u Rwanda naho Safi akaba yarigaga i Gitwe gusa akaba yarakundaga kuba ari i Huye mu muryango.

Nizzo ubusanzwe mbere ya 2007 yari asanzwe afite irindi tsinda yaririmbagamo, bidateye kabiri ahura na Humble G, nyuma nibwo bahuye na Safi nawe wari ufite mugenzi we baririmbanaga bose bafata icyemezo cyo gukora itsinda rimwe rya Urban Boyz ari abasore batanu.

Abasore batanu bari bagize itsindarya Urban Boyz yari; Rino G, Skotty, Humble G, Safi, ndetse na Nizzo. Ku mpamvu za bamwe Rino G ndetse na Skotty baje kuva mu itsinda hasigara batatu ari nabo bari kumwe uyu munsi aribo akaba ari Safi Madiba, Nizzo, na Humble G. Icyo gihe bahise bashyira hanze indirimbo yabo ya mbere mu mwaka wa 2007 bayihuriramo ari batanu bayita ’Ikicaro’.

Nyuma y’igihe gito bakorana ari batanu mu mwaka wa 2008 nibwo iri tsinda ryahise ritandukana hasigara 3, icyo gihe bahita bakorana indirimbo ya mbere bahuriyemo ari batatu bayita ’Sindi indyarya’ ari nayo yababereye itike ibinjiza muri Kigali.

Iri tsinda ryatangiriye i Huye uko barushagaho gutera imbere ni nako bimuye ikicaro berekeza mu mujyi wa Kigali.

Mu mwaka wa 2009 nibwo iri tsinda ryafashe icyemezo cyo kuva i Huye bakerekeza mu mujyi wa Kigali, aho bari bagiye guhanganira n’abandi bahanzi bari bahatuye ari naho bakorera umuziki wabo.

Byari bigoye kuko aba bahanzi basaga n’abavuye mu rugo bagiye mu rw’abandi, bari ibyamamare i Huye ariko i Kigali amazina yabo ntiyari aremereye kandi niho haberaga ibitaramo binyuranye bikomeye mbega niwo wari umurwa wa muzika.

Nyuma yo kwisanga ari batatu ntibigeze bacika intege itsinda rya Urban Boyz ryakomeje gukora kuva 2009 binjiye mu mujyi wa Kigali, batangiranye na Sindindyarya nk’indirimbo yabinjije mu mujyi wa Kigali, nyuma bagiye bakora indirimbo nyinshi zinyuranye biborohera kuzuza album 5 ndetse n’indi ya gatandatu bari gukoraho izajya hanze mu mpera z’umwaka wa 2016.

Muri Album 6 zose iri tsinda rimaze gushyira imwe yanyuma bamuritse umwaka ushize ya “Adam na Eva” niyo bakoreye I Huye ku ivuko, Gatebe Gatoki,Ishyamba, Ku rugamba ndetse na Kelele .

Aba basore babarizwa mu nzu itunganya imiziki ya Super Level, kandi bakoranye indirimbo na benshi mu byamamare nka Jackie Chandiru ari nawe batangiriyeho gukorana n’umunyamahanga.

Nyuma ya Jackie Chandiru aba basore bakoranye kandi na Iyanya mu ndirimbo Tayali, bakorana na Timaya mu ndirimbo Show me love, Radio and Weasel bakoranye Pete Kidole ndetse na Sat B w’umurundi mu ndirimbo Urankirigita.

Urban boyz Urban Boyz bagiye bafata za rutemikerere inshuro nyinshi bagiye mu bitaramo binyuranye hanze y’igihugu.

 

Urban boys bitabiriye ibitaramo bikomeye banaririmbana n’abahanzi b’ibyamamare muri Afurika nka Burnaboy, M.I Abaga, Iyanya, Awilo Longomba, Waje, Victoria Kimani, Vanessa Mdee, Bebe cool, Radio na Weasel, Navio, Sheebah n’abandi.

Urban boys bitabiriye kandi bimwe mu bitaramo bikomeye mpuzamahanga aho uretse East African Party baririmbiye nanone muri Uganda, Burundi,Kenya.

Usibye mu karere kandi Urban Boyz nanone baririmbye mu bitaramo binyuranye ku mugabane w’i Burayi aho twavuga nk’icyo bakoreye mu Bubiligi ndetse no mu Busuwisi mu mwaka wa 2015. 

Abasore batatu bagize itsinda rya Urban Boyz bagiye bitabira amarushanwa anyuranye ari nako batsindira ibihembo binyuranye byose hamwe muri rusange Urban Boyz ikaba ifite ibihembo 10 ibitse mu kabati mu gihe cy’imyaka umunani bamaranye ari batatu.

Dore urutonde rw’amarushanwa ndetse n’ibihembo Urban Boyz yatsindiye.

Muri 2009, 2012 na 2013 batwaye ibikombe bitandukanye muri Salax Award

:2009: Best group of the Year

2012: -Best Group of the year

 -Artist of the year

 -Best Male artist of the year

 -Best video of the year

2013: -Best group of the year

 -Best video of the Year

 -Song of the year

2013:-Aba bahanzi bitabiriye irushanwa rya Primus Guma Guma Super Star3 aha bakaba barabaye aba kabiri.

2014: Urban Boyz yahataniye igihembo muri Hipipo music award (East African super hit) n’indirimbo yabo TAYALI.

2014: Urban Boyz bitabiriye na none iserukiramuco rya GIDI CULTUREL FESTIVAL banaririmbyemo muri Nigeria.

2015: Urban Boyz yatsindiye igihembo cya Video y’ukwezi “Soroma nsorome” muri Nyakanga 2015.

2016: Yegukanye irushanwa ritegurwa na Blarirwa ariryo primus Guma Guma Super star season ya 6

Kuva 2008 Urban Boyz yari ifite umujyanama witwa 2PAC wabafashaga gukurikirana ibihangano byabo cyane ko babanaga i Huye, bakigera i Kigali aba basore bahuye na Muyoboke Alex maze tariki 6 Mutarama 2012 basinyana amasezerano.

Baje gutandukana nyuma y’umwaka umwe dore ko batandukanye tariki 10 Gicurasi 2013. Kuva 2012 aba bahanzi bahise bashinga studio bayita Super level birangira banasinyanye amasezerano na Richard Nsengumuremyi wahise aba umujyanama wabo muri 2014, akaba ari nawe bari gukorana kugeza magingo aya .

urban

Ibyo Urban Boyz batazibagirwa mu rugendo rwabo

Iyo uganira n’aba basore usanga hari bimwe mu bintu badashobora kuzigera bibagirwa mu byababayeho, urugero ni nkaho muri 2007 ubwo bitabiraga igitaramo cya “Kunda umuziki nyarwanda” bavuye i Huye bagera i Kigali bakabemerera kuririmba ku bwa burembe nabwo habanje kujyaho imbaraga za bamwe mu bantu bari bafite ijambo muri muzika muri iyo minsi, nyamara aribwo bari bagiye kuririmbira abafana b’i Kigali bwa mbere.

Uko kuzengerezwa no kuririmbira i Kigali bwa mbere ni kimwe mu bintu aba basore batazigera bibagirwa.

Ntibazibagirwa nyakwigendera Dr Jacques wabashije gutandukanya impano ya buri wese, aha kimwe mu byo Dr Jacques azahora yibukirwaho n’iri tsinda ni uburyo yahinduriye injyana Nizzo akamuvana kuri Rap agatuma aba umuririmbyi.

Dusoza amateka ndetse n’ibigwi by’iri tsinda twabamenyesha ko aba ari abasore baba abagabo bo guhamya ko umuziki ari umwuga ushobora gutunga umuntu ukamukiza usibye no kumutunga.

Usibye ku ruhande rw’ubutunzi iri tsinda ryungutse rikuye mu muziki baba abagabo bo guhamya ko umuziki wafasha umuntu muri byinshi kuko abo byagoye kugera i Kigali ubu ari bamwe mu bantu bogoga amahanga cyane ko ari bamwe mu bahanzi nyarwanda bake bakoreye ibitaramo mu Bubiligi, u Busuwisi, Nigeria, Uganda, Kenya, Burundi n’ahandi bagiye gutaramira cyangwa mu bikorwa bya muzika.

Emmy Twahirwa