Nyaruguru: Ikipe ya Ngoma izabahagararira ku rwego rw’Intara mu marushanwa y’ Imboni z’umupaka

Yanditswe na RUKUNDO Emmanuel Kuwa 12/01/2020, Saa 16:46:53 Yasuwe inshuro 152

Muri aka karere kuri uyu wa 10 Mutarama 2020, hasojwe irushanwa ryari rimaze igihe rikinwa kuva mu Tugari, kugera ku rwego rw’Akarere

Ni irushanwa ryitwaga ”Imboni z’umupaka” ryari rigamije gukora ubukangurambaga mu baturage baturiye umupaka w’Intara y’Amajyepfo n’Igihugu cy’u Burundi.

Ryari rifite intego igira iti:” umuturage utekanye, uteye imbere kandi ufite imibereho myiza” ryitabiriwe n’abo mu Mirenge ya Ngoma, Nyagisozi, na Cyahinda mu ndirimbo n’imbyino, imivugo, imikino mbarankuru, ikinamico ngufi, n’umupira w’amaguru, no Gukemura ibibazo bibangamiye abaturage.

Umuyobozi ushinzwe urubyiruko mu karere ka Nyaruguru Muhoza Theogene.avuga ko aya marushanwa yaziye igihe, kuko yazamuye impano za bamwe zari zihishe mu Mirenge kandi ngo anagira uruhare runini mu gutangirwamo ubutumwa.

Yagize ati:”Aya marushanwa yagize uruhare mu kutwereka impano zitandukanye ziri mu baturage. Ikindi dushima, ni ubutumwa bwayatangiwemo, kandi turishimira ko yagenze neza kuko n’abaturage banayitabiriye mu buryo bushimishije.”

Naho, umuyobozi ushinzwe abinjira n’abasohoka mu karere ka Nyaruguru Kalisa Moses avuga ko n’ubwo aya marushanwa asojwe mu karere ka Nyaruguru, ariko ibikorwa byo kwigisha abaturage kuba imboni z’umupaka bizakomeza.

Ati:”Yego! rirasojwe ariko ibikorwa bizakomeza by’ubukangurambaga ku baturiye umupaka.”

Ni amaruhanwa yari yitabiriwe n’abayobozi batanduanye ku rwego rw’akarere barimo, ushinzwe imiyoborere myiza, umuyobozi ushinzwe abinjira n’abasohoka, umuyobozi wa traffic Police, n’abandi…..

Abatsindiye kuzahagararia akarere ka Nyaruguru ni ikipe y’umupira w’amaguru ya Ngoma yatsinze iy’umurenge wa Cyahinda ibitego 2-1, uwitwa Mukasine Cansilide watsinze mu mivugo, itorero Imbere heza rya Ngoma, Abakundamahoro ba Cyahinda batsinze mu dukino mbarankuru, na Cyahinda yatsinze mu cyo bari bise HIS.

Aya marushanwa yatangiye ku itariki ya 27/12/2019 asozwa taliki ya 10/01/2020.
Amarushanwa ku rwego rw’Intara azaba hagati y’amatariki ya 11-15/01/2020, mugihe amarushanwa ya nyuma ku rwego rw’Intara mu bindi byiciro azaba hagati y’amatariki ya 11-15/01/2020.

Umukino wa nyuma w’umupira w’amaguru wo, uzaba ku itariki ya 18/01/2019 ari nabwo hateganyijwe ibirori byo guhemba abarushije abandi ku rwego rw’Intara mu marushanwa y’imboni z’Umupaka n’Imboni z’Ibidukikije.