CAF Champions league: Esperence de Tunis yegukanye igikombe ku munota wa 58 nyuma yuko Wydad Casablanca yanze gusubira mu kibuga

Yanditswe na NIYOYITA Jean d’Amour Kuwa 1/06/2019, Saa 08:56:39 Yasuwe inshuro 405

Mu mukino wo kwishyura wa nyuma mu mikino ya CAF Champions league wabereye kuri stade ya Olympique i Rades muri Tunisia ukaza kurangira ku munota wa 58 bitunguranye ikipe ya Wydad Casablanca iva mu kibuga kubera igitego cyayo umusifuzi yari amaze kwanga.

Iyi kipe ya Esperance de Tunis yo muri Tunisia byatumye yegukana igikombe cyayo cya kane cya CAF Champions league, nyuma yo gutsinda Wydad Casablanca yo muri Maroc igitego kimwe ku busa, mu kukino wa kabiri wo kwishyura.

Ni nyuma y’umukino ubanza amakipe yombi yari yahuriyemo kuri Stade Prince Moulay Abdellah i Rabat muri Maroc, ukarangira amakipe yombi anganyije igitego kimwe ku kindi.
Umukino wo kwishyura wabereye kuri Stade Olympique y’i Rades i Tunis, gusa ntiwarangira kubera ko abakinnyi ba Wydad Casablanca bigumuye bikarangira bavuye mu kibuga kuko umusifuzi wari uyoboye uyu mukino w’umumunya-Gambia Bakary Papa Gassama yari amaze kwanga igitego bari bamaze gutsinda gitsinzwe na Walid El Karti ku munota wa 58 w’umukino.

Nyuma yo gutegereza amasaha abiri yose bikarangira Wydad Casablanca yanze kugaruka mu kibuga, ikipe ya Esperance de Tunis yahise ishyikirizwa igikombe. Byabaye ngombwa ko na Perezida wa CAF Ahmad Ahmad yinginga abakinnyi ba Wydad, ariko birangira banze kugaruka mu kibuga.

Nyuma y’umukino, Kapiteni wa Wydad Casablanca Khalil El Shamam yabwiye beINSports ko mbere y’umukino umusifuzi yari yababwiye ko VAR ifite ibibazo, gusa akaba atigeze abyumva.
Esperance de Tunis yisubije iki gikombe, nyuma y’igitego yari yatsindiwe ku munota wa 41 na Mohamed Belaili.