Arsene Wenger warumaze imyaka 22 atoza Arsenal FC yasezeye

Yanditswe na MAZIMPAKA Patrick Kuwa 20/04/2018, Saa 16:22:24 Yasuwe inshuro 488

Nyuma y’imyaka 22, umufaransa watozaga Arsenal yasohoye itangazo kuri uyu wa 20 Mata 2017 asezera ku bafana b’iyi kipe, aho yatangaje ko azava ku mwanya wo gutoza iyi kipe ku musozo w’uyu mwaka wa shampiyona.

Arsene wenger yagize ati: “Nyuma yo gusuzuma neza na nyuma y’ibiganiro nagiranye n’ikipe, ndumva ari igihe gikwiye kugira ngo nsezere nyuma y’uyu mwaka wa shampiyona.”

Wenger asezeye muri iyi kipe mbere y’umwaka umwe ngo amasezerano yaherukaga gusinya ngo arangire. Asize iyi kipe ku mwanya wa gatandatu ku rutonde rwa Shampiyona y’u Bwongereza ruyobowe na Manchester City yamaze kwegukana igikombe.

Wenger wagiye muri iyi kipe avuye mu yitwa Nagoya Grampus yo mu Buyapani mu 1996, yasohoye itangazo asezera ku bafana kuri uyu wa 20 Mata 2018, mbere y’umukino iyi kipe igomba guhuramo na West Ham FC kuri iki Cyumweru.

Mu gusezera kwe, Wenger yakomeje agira ati “Nshimishijwe no kuba naragize icyuhabiro cyo gukorera iyi kipe mu myaka myinshi y’ibyiza bitabarika. Ku bakunzi bose ba Arsenal, mukomeze kuzirikana agaciro k’iyi kipe.”

Umunyamigabane uruta abandi muri Arsenal, Stan Kroenke, we yavuze ko uyu mwanzuro wa Wenger ari kimwe mu bihe bikomeye bagize mu myaka yose bamaze muri siporo. Yakomeje agira ati “Imwe mu mpamvu yatumye dukorana na Arsenal ni ukubera ibyo Arsene yazanye muri iyi kipe, haba mu kibuga ndetse no hanze yacyo. Igihe yari amaze no guhora ahantu heza mu gihe nk’iki yari amaze mu mukino nta muntu uzigera agishyikira.”

Uyu Munyamerika yamushimiye uburyo yahinduye umupira w’amaguru iyi kipe ikina, ndetse n’impinduka yazanye mu mukino w’Abongereza muri rusange.

Wenger yatangiye gutoza Arsenal ku wa 1 Ukwakira 1996, akaba ari we mutoza umaze igihe kinini atoza ikipe imwe ukiri mu mukino, aho ayitoje imikino 823. Gusa byari bigeze aho abafana bamwe batamwumva cyane cyane mu myaka ibiri ishize, bitewe n’uburyo ikipe ye itari ikibasha guhatana n’iza mbere.

Wenger yari amaze igihe atishimiwe n’abafana bamusaba gusezera

Kugeza ubu Arsenal ntanamahirwe ifite yo kugera muri enye za mbere zemerewe gukina Champions League kuko irushwa na Tottenham Hotspur F.C ya kane amanota 14 mu gihe hasigaye imikino itanu. Kugira ngo bazagaragare muri iri rushanwa ry’ibihangange i Burayi, bagomba gutwara irushanwa rya Europa League.

Nubwo yari amaze igihe atitwara neza ariko Wenger ntazibagirana ku mitima y’abakunzi ba Arsenal

Inkuru dukesha BBC


      

Tanga igitekerezo

-->