Urukiko rwarekuye Umunyamakuru Eminente hagamijwe kurengera ubuzima bwe

Yanditswe na Ubwanditsi Kuwa 22/02/2018, Saa 17:30:13 Yasuwe inshuro 2477

Urukiko rw’Ibanze rwa Rusororo rwafashe umwanzuro wo kurekura umunyamakuru Mugabushaka Jeanne de Chantal wamenyekanye nka Eminante kubera impamvu z’uburwayi amaranye igihe.

Ku gicamunsi cyo kuri uyu wa Kane nibwo urukiko rwafashe umwanzuro wo kurekura Eminante wari umaze iminsi arwaye dore ko mu minsi ishize yari mu bitaro bya Kigali, CHUK.

Tariki ya 27 Ugushyingo 2017 nibwo yagejejwe mu bitaro bya CHUK, bukeye bwaho ahita abagwa ukuguru kw’ibumoso. Bivugwa ko iyi ndwara yigeze kugerageza kuyivuza muri Leta Zunze Ubumwe za Amerika ariko ikaba itarakira.

Umwanzuro wo kumurekura wafashwe mu rwego rwo kurengera ubuzima bwe gusa akazakomeza gukurikiranwa ari hanze nk’uko Igihe dukesha iyi nkuru cyabyanditse.

Eminante yari yarajuririye igifungo cy’imyaka itatu n’amezi abiri yari yarakatiwe muri Gicurasi 2017 nyuma yo gutabwa muri yombi tariki 27 Ugushyingo 2016.

Yareganwaga hamwe na Bizimana Ibrahim bombi bari barahamwe n’icyaha cy’ubwambuzi bushukana mu rubanza rwaciwe n’Urukiko rw’Ibanze rwa Kacyiru ku wa Gatanu tariki ya 12 Gicurasi 2017.

Usibye gufungwa imyaka itatu n’amezi abiri bari basabwe gutanga ihazabu y’amafaranga y’u Rwanda angana na miliyoni eshatu buri umwe.

Mu itabwa muri yombi rya Eminante byavugwaga ko akurikiranyweho icyaha cyo kwaka amafaranga abanyamadini abizeza kubashakira ibyangombwa mu Rwego rw’Imiyoborere (RGB).

Eminante yamenyekanye cyane nk’Umunyamakuru kuri Contact FM, Radio na TV 10 mu biganiro by’ubusesenguzi. Yanakunze kugaragara nk’umukemurampaka mu bikorwa byo gutora Nyampinga w’u Rwanda ndetse no mu kuyobora ibiganiro mpaka bitandukanye.


      

Tanga igitekerezo

-->