Mu Rwanda abagera kuri 50 bamaze kwandura icyorezo cya Koronavirusi (COVID-19)

Yanditswe na Ubwanditsi Kuwa 27/03/2020, Saa 14:46:53 Yasuwe inshuro 98

Kuri uyu wa Kane tariki ya 26 Werurwe, 2020 Minisiteri y’Ubuzima yasohoye itangazo rivuga ko hagaragaye abantu bashya 9 barwaye Koronavirusi bikaba byatumye umubare w’abarwaye Koronavirusi mu Rwanda uva kuri 41 ugera kuri 50.

Mu barwayi bagaragaye uyu munsi harimo 5 bageze mu Rwada baturutse i Dubai bahita bashyirwa mu kato, 1 waje aturutse muri Amerika ahita ashyirwa mu kato, 1 waje aturutse mu Buholandi wahuye n’undi urwaye Koronavirusi mu Rwanda ahita ashyirwa mu kato n’abandi 2 bahuye n’abanduye Koronavirusi mu Rwanda bahita bashyirwa mu kato.

Ku wa14 Werurwe, 2020 ni bwo u Rwanda rwatangaje umurwayi wa mbere wa COVID-19, akaba ari umuhinde wageze mu Rwanda ku wa 08 Werurwe, 2020 aturutse Mumbai mu Buhinde. Akigera mu Rwanda nta bimenyetso (umuriro, inkorora, guhumeka bigoranye cyangwa inkorora) bya Koronavirusi yari afite kugeza ubwo yijyanye kwa muganga ku wa 13 Werurwe, 2020.

Kuva COVID-19 yagera mu Rwanda, umubare munini w’abayanduye wagaragaye ku wa 23 Werurwe, 2020 aho abantu 17 bemejwe ko bayanduye muri bo harimo 9 baje baturutse i Dubai.

Imibare y’abamaze kwandura iki cyorezo mu Rwanda igaragaza ko abenshi ari abaturutse i Dubai. Kugeza ubu, hamaze gutangazwa abanyarwanda 21 banduye Koronavirusi baturutse i Dubai.

Ni mu gihe abandi bagiye baturuka mu bihugu bitandukanye harimo Leta Zunze Ubumwe za Amerika (USA), Qatar, Kenya, Ubufaransa, Ubwongereza, Ubudage, Ububiligi, Ubuhinde, Sudani y’Amajyepfo n’ibirwa bya Fiji.

Minisiteri y’Ubuzima itangaza ko aba barwayi bose bameze neza ku buryo hari n’abashobora gusezererwa mu gihe gito kandi ingamba zashyizweho zizahagarika ikwirakwira ry’iki cyorezo.

Ibi Dr. Daniel Ngamije, Minisitiri w’Ubuzima yabivuze kuri uyu wa 26 Werurwe, 2020 mu kiganiro kuri Televiziyo y’u Rwanda aho yavuze ko bashyizeho uburyo bwo gushakisha abantu bose bafite aho bahuriye n’abarwaye Koronavirusi.
Yavuze ko kugeza ubu habarurwa abantu barenga 1000 bahuye n’abarwaye Koronavirus, bakaba bamaze gukurikirana abarenga ibihumbi 9000 bavuyemo 3 bemejwe ko banduye.

Imibare y’Umuryango Mpuzamahanga wita ku Buzima (WHO) yo ku wa 26 Werurwe, 2020 igaragaza ko ku isi yose COVID-19 imaze kugera mu bihugu 199, abagera ku 465,915 bamaze ku yandura na ho 21,031 imaze kubahitana.