Birabujijwe mu mategeko y’u Rwanda gutanga imbabazi?-Umusenateri abaza Busingye

Yanditswe na Ubwanditsi Kuwa 29/03/2018, Saa 11:46:39 Yasuwe inshuro 349

Ministeri y’ubutabera iratangaza ko igiye kuvugurura amategeko arebana n’ifunga ry’agateganyo kugira ngo ikureho ibyifuzo bya hato na hato by’abashinjacyaha basaba kongererwa igihe bavuga ko bagikora iperereza.

Ubwo yari yitabye inteko ya senat kuwa kabiri, ministri w’ubutabera, Johnson Busingye, yavuze ko buri mushinjacyaha azajya asabwa kugaragaza icyo yakoze mu gihe kigenwa n’amategeko mbere yo gusaba kongererwa ikindi gihe.

Abagize senat bavuze no ku kibazo cy’ubucucike mu magereza, basaba ko hagira igikorwa mu gihe cya vuba mu rwego rwo kubahiriza uburenganzira bw’abafunze.

Ubwo yari imbere y’umutwe wa senat, ministri w’ubutabera yavuze ku kibazo cy’itinda ry’imanza rikunze kunengwa mu butabera bw’u Rwanda.

Mu manza zitari nkeya, abaregwa bamara igihe kinini muri gereza bataratangira kuburanishwa kubera ko abashinjabyaha bakunze gusaba kongererwa igihe bya hato na hato bavuga ko ari ku nyungu z’iperereza.

Havuzwe kandi no ku bantu bamara igihe kirenze bafungiye kuri stasiyo za polisi kandi amategeko atanga igihe ntarengwa.

Bwana Johnson Busingye yavuze ko iki ari ikibazo gikomeye kandi ko cyatangiye gutekerezwa mu ivugururwa rikorwa mu micire y’imanza.

Yavuze ati: "Mu gihe umushinjacyaha asabye kongererwa igihe, agomba kugaragaza icyo yakoze mu minsi 30 ya mbere.

"Mu gihe atabashije kubigaragaza uregwa agomba kurekurwa, agakurikiranwa ari hanze."

Umusenateri yagaragaje iki kibazo avuga ati: "Hagati ya 2016 na 2017, muri gereza hinjiye abantu ibihumbi cumi na kimwe.

"Ariko ko nta mbabazi tujya tugira? Birabujijwe mu mategeko y’u Rwanda?"

Ministri w’ubutabera yemeye ko iki kibazo cy’ubucucike kigihari kubera ko ibyaha bigenda byiyongera, gusa aha naho ngo Leta yatangiye kuhatekereza.

Ariko ko nta mbabazi tujya tugira? Birabujijwe mu mategeko y’u Rwanda?
Umwe mu basenateri bo mu Rwanda, yabajije ikibazo.

Bwana Busingye yagize ati: "Dukwiye kureba uko abinjira bahindurwa vuba noneho bakaba basabirwa gufungurwa by’imbabazi kurusha gusaba ko inkiko zitatanga ibihano by’igifungo.

"Ntitwabuza ko hagira uwinjira muri gereza ariko twafasha uwinjiye guhinduka agasohoka vuba."

Havuzwe kandi no ku bantu bamara igihe kirenze bafungiye kuri stasiyo za polisi kandi amategeko atanga igihe ntarengwa.

Ministri w’ubutabera avuga ko iki ari kimwe mu bibazo bikibangamira uburenganzira bw’abakurikiranyweho ibyaha.

Yavuze ko iki kizarangizwa n’amavugurura ateganywa kuri stasiyo za polisi, zigahabwa ubushobozi bw’ikoranabuhanga ribafasha gucunga imifungire.

Iki kibazo cy’ifungwa ryirengagije amategeko gikunze kugaragaza iyo abaregwa bemerewe kugera imbere y’umucamanza.

Abatari bake basaba kurekurwa bashingiye gusa ku ihame ry’uko barengeje igihe itegeko ryemera ko bagomba kumara mu maboko y’igipolisi.

Inkuru ya BBC


      

Tanga igitekerezo

-->