Sri Lanka Abagera kuri 15 bamaze kugwa mu iturika ryabaye mu gikorwa cyo gusaka

Yanditswe na NIYOYITA Jean d’Amour Kuwa 27/04/2019, Saa 10:25:10 Yasuwe inshuro 380

Polisi ya Sri Lanka ivuga ko imirambo 15 irimo n’iy’abana batandatu yabonetse nyuma y’iturika ryabereye ahacyekwa kuba hihishe umutwe w’intagondwa zigendera ku mahame akaze y’idini ya isilamu mu burasirazuba bw’igihugu.

Polisi yanavuze ko mu bapfuye harimo n’abagore batatu, byemezwa ko ari abo mu miryango y’abacyekwa kuba mu mutwe w’intagondwa.

Uko kurasana kwabereye mu mujyi wa Sainthamaruthu, utari kure y’umujyi wari utuwemo na Zahran Hashim ucyekwaho kuba umuyobozi w’itsinda ry’abagabye ibitero byo ku cyumweru gishize cya Pasika.

Abahatuye babwiye BBC ko bumvise igiturika kigakurikirwa n’amasasu mu gihe cy’amasaha menshi.
Muri icyo gihe kandi, abashinzwe umutekano basatse baguye gitumo indi nyubako yo mu mujyi uri hafi aho, aho bavuga ko basanze ibiturika ndetse n’akadege kigurutsa nta mupilote kazwi nka "drone".

Umutekano uracyakajijwe muri Sri Lanka nyuma y’ibitero byo ku cyumweru gishize byahitanye abagera kuri 250 naho abarenga 500 bagakomereka.

Abayobozii bavuze ko byagabwe n’umutwe ugendera ku mahame akaze y’idini ya isilamu uzwi nka National Tawheed Jamath, nubwo umutwe wiyita leta ya kisilamu nawo wavuze ko ari wo wagabye ibyo bitero.

Kiliziya Gatolika muri iki gihugu yatangaje ko yakuyeho misa zose zo ku cyumweru kugeza bwongeye gutanga irindi tangazo.
Abakuriye Kiliziya Gatolika muri Sri Lanka bavuze ko bafashe iki cyemezo kubera impungenge zuko hashobora kuba ibindi bitero.